॥ ಶ್ರೀಮದ್ ಭಾಗವತ ಪುರಾಣಮ್ ॥
ಪ್ರಥಮ ಸ್ಕಂಧಃ
ಷಷ್ಠೋSಧ್ಯಾಯಃ
ಸೂತ ಉವಾಚ-
ಏವಂ ನಿಶಮ್ಯ ಭಗವಾನ್
ದೇವರ್ಷೇರ್ಜನ್ಮ ಕರ್ಮ ಚ ।
ಭೂಯಃ ಪಪ್ರಚ್ಛ ತಂ ಬ್ರಹ್ಮನ್
ವ್ಯಾಸಃ ಸತ್ಯವತೀಸುತಃ ॥೧॥
ಶ್ರೀವ್ಯಾಸ ಉವಾಚ-
ಭಿಕ್ಷುಭಿರ್ವಿಪ್ರವಸಿತೇ
ವಿಜ್ಞಾನಾದೇಷ್ಟೃಭಿಸ್ತವ ।
ವರ್ತಮಾನೋ ವಯಸ್ಯಾದ್ಯೇ
ತತಃ ಕಿಮಕರೋದ್ ಭವಾನ್ ॥೨॥
ಸ್ವಾಯಂಭುವ ಕಯಾ ವೃತ್ತ್ಯಾ
ವರ್ತಿತಂ ತೇ ಪರಂ ವಯಃ ।
ಕಥಂ ವೇದಮುದಸ್ರಾಕ್ಷೀಃ
ಕಾಲೇ ಪ್ರಾಪ್ತೇ ಕಳೇಬರಮ್ ॥೩॥
ಪ್ರಾಕ್ಕಲ್ಪವಿಷಯಾಮೇತಾಂ
ಸ್ಮೃತಿಂ ತೇ ಸುರಸತ್ತಮ ।
ನ ಹ್ಯೇವ ವ್ಯವಧಾತ್
ಕಾಲ ಏಷ ಸರ್ವನಿರಾಕೃತಿಃ ॥೪॥
ಶ್ರೀನಾರದ ಉವಾಚ-
ಭಿಕ್ಷುಭಿರ್ವಿಪ್ರವಸಿತೇ
ವಿಜ್ಞಾನಾದೇಷ್ಟೃಭಿರ್ಮಮ ।
ವರ್ತಮಾನೋ ವಯಸ್ಯಾದ್ಯೇ
ತತ ಏತದಕಾರ್ಷಮ್ ॥೫॥
ಏಕಾತ್ಮಜಾ ಮೇ ಜನನೀ
ಯೋಷಿನ್ಮೂಢಾ ಚ ಕಿಂಕರೀ ।
ಮಯ್ಯಾತ್ಮಜೇSನನ್ಯಗತೌ
ಚಕ್ರೇ ಸ್ನೇಹಾನುಬಂಧನಮ್ ॥೬॥
ಸಾSಸ್ವತಂತ್ರಾ ನ ಕಲ್ಪಾSSಸೀದ್
ಯೋಗಕ್ಷೇಮಂ ಮಮೇಚ್ಛತೀ ।
ಈಶಸ್ಯ ಹಿ ವಶೇ ಲೋಕೋ
ಯೋಷಾ ದಾರುಮಯೀ ಯಥಾ ॥೭॥
ಅಹಂ ಚ ತದ್ಬ್ರಹ್ಮಕುಲ
ಊಷಿವಾಂಸ್ತದಪೇಕ್ಷಯಾ ।
ದಿಗ್ದೇಶಕಾಲಾವ್ಯುತ್ಪನ್ನೋ
ಬಾಲಕಃ ಪಂಚಹಾಯನಃ ॥೮॥
ಏಕದಾ ನಿರ್ಗತಾಂ ಗೇಹಾದ್
ದುಹಂತೀಂ ನಿಶಿ ಗಾಂ ಪಥಿ ।
ಸರ್ಪೋSದಶತ್ ಪದಾ ಸ್ಪೃಷ್ಟಃ
ಕೃಪಣಾಂ ಕಾಲಚೋದಿತಃ ॥೯॥
ತದಾ ತದಹಮೀಶಸ್ಯ ಭಕ್ತಾನಾಂ
ಸಮಭೀಪ್ಸಿತಮ್ ।
ಅನುಗ್ರಹಂ ಮನ್ಯಮಾನಃ
ಪ್ರಾತಿಷ್ಠಂ ದಿಶಮುತ್ತರಾಮ್ ॥೧೦॥
ಸ್ಫೀತಾನ್ ಜನಪದಾಂಸ್ತತ್ರ
ಪುರಗ್ರಾಮವ್ರಜಾಕರಾನ್ ।
ಖೇಟಾನ್ ಪಟ್ಟನವಾಟೀಶ್ಚ
ವನಾನ್ಯುಪವನಾನಿ ಚ ॥೧೧॥
ವಿಚಿತ್ರಧಾತುವಿಚಿತ್ರಾದ್ರೀನಿಭಭಗ್ನಭುಜದ್ರುಮಾನ್
।
ಜಲಾಶಯಾಂಶ್ಚಿವಜಲಾನ್
ನಳಿನೀಃ ಸುರಸೇವಿತಾಃ ॥೧೨॥
ಚಿತ್ರಸ್ವನೈಃ ಪತ್ರರಥೈರ್ವಿಭ್ರಮದ್ಭ್ರಮರಶ್ರಿಯಃ
।
ನಳವೇಣುಶರಸ್ತಂಬಕುಶಕೀಚಕಗಹ್ವರಮ್
॥೧೩॥
ಏಕ ಏವಾತಿಯಾತೋSಹಮದ್ರಾಕ್ಷಂ
ವಿಪಿನಂ ಮಹತ್ ।
ಘೋರಂ ಪ್ರತಿಭಯಾಕಾರಂ
ವ್ಯಾಳೋಲೂಕಶಿವಾಜಿರಮ್ ॥೧೪॥
ಪರಿಶ್ರಾಂತೇಂದ್ರಿಯಾತ್ಮಾSಹಂ
ತೃಟ್ಪರೀತೋ ಬುಭುಕ್ಷಿತಃ ।
ಸ್ನಾತ್ವಾ ಪೀತ್ವಾ ಹ್ರದೇ
ನದ್ಯಾ ಉಪಸ್ಪೃಷ್ಟೋ ಗತಶ್ರಮಃ ॥೧೫॥
ತಸ್ಮಿನ್ ನಿರ್ಮನುಜೇSರಣ್ಯೇ
ಪಿಪ್ಪಲೋಪಸ್ಥ ಆಶ್ರಿತಃ ।
ಆತ್ಮನಾSSತ್ಮಾನಮಾತ್ಮಸ್ಥಂ
ಯಥಾಶ್ರುತಮಚಿಂತಯಮ್ ॥೧೬॥
ಸ್ವಪ್ನೋ ಮಾಯಾಗ್ರಹಃ
ಶಯ್ಯಾಜಾಗ್ರದಾಭಾಸ ಆತ್ಮನಃ ।
ನಾಮರೂಪಕ್ರಿಯಾವೃತ್ತಿಃ
ಸಂವಿಚ್ಛಾಸ್ತ್ರಂ ಪರಂ ಪದಮ್ ॥೧೭॥
ನೇಂದ್ರಿಯಾರ್ಥಂ ನ
ಚ ಸ್ವಪ್ನಂ ನ ಸುಪ್ತಂ ನ ಮನೋರಥಮ್ ।
ನ ನಿರೋಧಂ ಚಾನುಗಚ್ಛೇಚ್ಚಿತ್ರಂ
ತದ್ ಭಗವತ್ಪದಮ್ ॥೧೮॥
ಸ ಏಕೋ ಭಗವಾನಗ್ರೇ ಕ್ರೀಡಿಷ್ಯನ್ನಿದಮಾತ್ಮನಃ ।
ಸೃಷ್ಟ್ವಾವಿಹೃತ್ಯ
ತಜ್ಜಗ್ಧ್ವಾ ಉದಾಸ್ತೇ ಕೇವಲಃ ಪುನಃ ॥೧೯॥
ಧ್ಯಾಯತಶ್ಚರಣಾಂಭೋಜಂ
ಭಾವನಿರ್ವೃತಚೇತಸಃ ।
ಉತ್ಕಂಠಾಶ್ರುಕಳಾಕ್ಷಸ್ಯ
ಹೃದ್ಯಾಸೀನ್ಮೇ ಶನೈರ್ಹರಿಃ ॥೨೦॥
ಪ್ರೇಮಾತಿಭರನಿರ್ಭಿನ್ನ
ಪುಲಕಾಂಗೋSSತಿನಿರ್ವೃತಃ ।
ಆನಂದಸಂಪ್ಲವೇ ಲೀನೋ
ನಾಪಶ್ಯಮುಭಯಂ ಮುನೇ ॥೨೧॥
ರೂಪಂ ಭಗವತೋ ಯತ್ತನ್ಮನಃಕಾಂತಂ
ಸುಖಾವಹಮ್ ।
ಅಪಶ್ಯನ್ ಸಹಸೋತ್ತಸ್ಥೌ
ಕೈವಲ್ಯಾದ್ ದುರ್ಮನಾ ಇವ ॥೨೨॥
ದಿದೃಕ್ಷುಸ್ತದಹಂ ಭೂಯಃ
ಪ್ರಣಿಧಾಯ ಮನೋ ಹೃದಿ ।
ವೀಕ್ಷಮಾಣೋSಪಿ ನಾಪಶ್ಯಮವಿತೃಪ್ತ
ಇವಾತುರಃ ॥೨೩॥
ಏವಂ ಯತಂತಂ ವಿಜನೇ ಮಾಮಾಹಾಗೋಚರೋ
ಗಿರಾಮ್ ।
ಗಂಭೀರಶ್ಲಕ್ಷ್ಣಯಾ ವಾಚಾ
ಶುಚಃ ಪ್ರಶಮಯನ್ನಿವ ॥೨೪॥
ಹಂತಾಸ್ಮಿನ್ ಜನ್ಮನಿ
ಭವಾನ್ ನ ಮಾಂ ದ್ರಷ್ಟುಮಿಹಾರ್ಹತಿ ।
ಅವಿಪಕ್ವಕಷಾಯಾಣಾಂ ದುರ್ದರ್ಶೋSಹಂ
ಕುಯೋಗಿನಾಮ್ ॥೨೫॥
ಸಕೃದ್ ಯದ್ದರ್ಶಿತಂ
ರೂಪಮೇತತ್ ಕಾಮಾಯ ತೇSನಘ ।
ಮತ್ಕಾಮಃ ಶನಕೈಃ ಸಾಧು
ಸರ್ವಾನ್ ಮುಂಚತಿ ಹೃಚ್ಛ್ರಯಾನ್ ॥೨೬॥
ಸತ್ಸೇವಯಾ ದೀರ್ಘಯಾ
ವೈ ಜಾತಾ ಮಯಿ ದೃಢಾ ಮತಿಃ ।
ಹಿತ್ವಾSವದ್ಯಮಿಮಂ ಲೋಕಂ
ಗಂತಾ ಮಜ್ಜನತಾಮಸಿ ॥೨೭॥
ಮತಿರ್ಮಯಿ ನಿಬದ್ಧೇಯಂ
ನ ವಿಪದ್ಯೇತ ಕರ್ಹಿಚಿತ್ ।
ಪ್ರಜಾಸರ್ಗನಿರೋಧೇSಪಿ
ಸ್ಮೃತಿಶ್ಚ ಮದನುಗ್ರಹಾತ್ ॥೨೮॥
ಏತಾವದುಕ್ತ್ವೋಪರರಾಮ
ತನ್ಮಹದ್ಭೂತಂ ನಭೋಲಿಂಗಮಲಿಂಗಮೀಶ್ವರಮ್ ।
ಅಹಂ ಚ ತಸ್ಮೈ ಮಹತಾಂ
ಮಹೀಯಸೇ ಶೀರ್ಷ್ಣಾSವನಾಮಂ ವಿದಧೇSನುಕಂಪಿತಃ ॥೨೯॥
ನಾಮಾನ್ಯನಂತಸ್ಯ ಗತತ್ರಪಃ
ಪಠನ್ ಗುಹ್ಯಾನಿ ಭದ್ರಾಣಿ ಕೃತಾನಿ ಚ ಸ್ಮರನ್ ।
ಗಾಂ ಪರ್ಯಟಂಸ್ತುಷ್ಟಮನಾ
ಗತಸ್ಪೃಹಃ ಕಾಲಂ ಪ್ರತೀಕ್ಷನ್ನಪಟೋ ವಿಮತ್ಸರಃ ॥೩೦॥
ಏವಂ ಕೃಷ್ಣಮತೇರ್ಬ್ರಹ್ಮನ್ನಸಕ್ತಸ್ಯಾಮಲಾತ್ಮನಃ
।
ಕಾಲಃ ಪ್ರಾದುರಭೂತ್
ಕಾಲೇ ತಟಿತ್ ಸೌದಾಮಿನೀ ಯಥಾ ॥೩೧॥
ಏವಂ ಮಯಿ ಪ್ರಯುಂಜಾನೇ
ಶುದ್ಧಾಂ ಭಾಗವತೀಂ ತನುಮ್ ।
ಪ್ರಾರಬ್ಧಕರ್ಮನಿರ್ವಾಣೋ
ನ್ಯಪತತ್ ಪಾಂಚಭೌತಿಕಃ ॥೩೨॥
ಕಲ್ಪಾಂತ ಇದಮಾದಾಯ ಶಯಾನೇSಮ್ಭಸ್ಯುದನ್ವತಃ
।
ಶಿಶಯಿಷ್ಣೋರನುಪ್ರಾಣಂ
ವಿವೇಶಾಂತರಹಂ ವಿಭೋಃ ॥೩೩॥
ಸಹಸ್ರಯುಗಪರ್ಯಂತ ಉತ್ಥಾಯೇದಂ
ಸಿಸೃಕ್ಷತಃ ।
ಮರೀಚಿಮಿಶ್ರಾ ಋಷಯಃ
ಪ್ರಾಣೇಭ್ಯೋSಹಂ ಚ ಜಜ್ಞಿರೇ ॥೩೪॥
ಅಂತರ್ಬಹಿಶ್ಚ ಲೋಕಾಂಸ್ತ್ರೀನ್
ಪರ್ಯೇಮ್ಯಸ್ಕಂದಿತವ್ರತಃ ।
ಅನುಗ್ರಹಾನ್ಮಹಾವಿಷ್ಣೋರವಿಘಾತಗತಿಃ
ಕ್ವಚಿತ್ ॥೩೫॥
ದೇವದತ್ತಾಮಿಮಾಂ ವೀಣಾಂ
ಸ್ವರಬ್ರಹ್ಮವಿಭೂಷಿತಾಮ್ ।
ಮೂರ್ಚ್ಛಯಿತ್ವಾ ಹರಿಕಥಾಂ
ಗಾಯಮಾನಶ್ಚರಾಮ್ಯಹಮ್ ॥೩೬॥
ಪ್ರಗಾಯತಶ್ಚ ವೀರ್ಯಾಣಿ
ತೀರ್ಥಪಾದಃ ಪ್ರಿಯಶ್ರವಾಃ ।
ಆಹೂತ ಇವ ಮೇ ಶೀಘ್ರಂ
ದರ್ಶನಂ ಯಾತಿ ಚೇತಸಿ ॥೩೭॥
ಏತದ್ಧ್ಯಾತುರಚಿತ್ತಾನಾಂ
ಮಾತ್ರಾಸ್ಪರ್ಶೇಚ್ಛಯಾ ಮುಹುಃ ।
ಭವಸಿಂಧುಪ್ಲವೋ ದೃಷ್ಟೋ
ಹರಿಚರ್ಯಾನುವರ್ಣನಮ್ ॥೩೮॥
ಯಮಾದಿಭಿರ್ಯೋಗಪಥೈಃ
ಕಾಮಲೋಭಹತೋ ಮುಹುಃ ।
ಮುಕುಂದಸೇವಯಾ ಯದ್ವತ್
ತಥಾತ್ಮಾSದ್ಧಾ ನ ಶಾಮ್ಯತಿ ॥೩೯॥
ಸರ್ವಂ ತದಿದಮಾಖ್ಯಾತಂ
ಯತ್ಪೃಷ್ಟೋSಹಂ ತ್ವಯಾSನಘ ।
ಜನ್ಮಕರ್ಮರಹಸ್ಯಂ ಮೇ
ಭವತಶ್ಚಾತ್ಮತೋಷಣಮ್ ॥೪೦॥
ಸೂತ ಉವಾಚ-
ಏವಂ ಸಂಭಾಷ್ಯ ಭಗವಾನ್
ನಾರದೋ ವಾಸವೀಸುತಮ್ ।
ಆಮಂತ್ರ್ಯ ವೀಣಾಂ ರಣಯನ್
ಯಯೌ ಯಾದೃಚ್ಛಿಕೋ ಮುನಿಃ ॥೪೧॥
ಅಹೋ ದೇವರ್ಷಿರ್ಧನ್ಯೋSಯಂ
ಯಃ ಕೀರ್ತಿಂ ಶಾಂರ್ಗಧನ್ವನಃ ।
ಗಾಯನ್ ಮಾಧ್ವಾ
ಗಿರಾ ತಂತ್ರ್ಯಾ ರಮಯತ್ಯಾತುರಂ ಜಗತ್ ॥೪೨॥
॥ ಇತಿ ಶ್ರೀಮದ್ಭಾಗವತೇ
ಮಹಾಪುರಾಣೇ ಪ್ರಥಮಸ್ಕಂಧೇ ಷಷ್ಠೋSಧ್ಯಾಯಃ ॥
ಭಾಗವತ ಮಹಾಪುರಾಣದ ಮೊದಲ ಸ್ಕಂಧದ ಆರನೇ ಅಧ್ಯಾಯ ಮುಗಿಯಿತು.
*********
